AFC, Concacaf na UEFA Waungana Kupinga Uongozi wa FIFA

Mzozo kati ya FIFA na baadhi ya Shirikisho kubwa za soka duniani umechukua sura mpya baada ya AFC, Concacaf na UEFA kutoa barua ya pamoja inayokosoa vikali mwenendo wa uongozi wa FIFA na kudai kuwa taasisi hiyo imepoteza mwelekeo wa uwajibikaji na uadilifu.

Barua hiyo iliyosainiwa na Rais wa AFC Salman bin Ibrahim Al Khalifa, Rais wa Concacaf Victor Montagliani na Rais wa UEFA Aleksander Čeferin, pamoja na makatibu wakuu wa mashirikisho hayo, imeongeza shinikizo kwa Rais wa FIFA Gianni Infantino baada ya mzozo ulioibuka kuhusu mpango wa kutafuta uwekezaji binafsi katika mashindano ya FIFA, ikiwemo Kombe la Dunia.

Hatua hiyo imekuja siku chache baada ya FIFA kumtetea Infantino na kusema kuwa alichaguliwa kidemokrasia na vyama 211 wanachama wa FIFA na kwamba bado anaendelea kuongoza kwa mamlaka waliyopewa na wanachama hao.

FIFA pia ilidai kuwa kuna juhudi zinazoendelea za baadhi ya watu kujaribu kuidhoofisha taasisi hiyo na Rais wake kupitia madai, tuhuma na taarifa zisizo na uthibitisho.

Hata hivyo, AFC, Concacaf na UEFA sasa zimechukua msimamo mkali zaidi, zikisema suala linalowakabili si fedha wala mgawanyo wa rasilimali za FIFA, bali ni uadilifu wa uongozi wa soka duniani.

Mashirikisho hayo matatu yamesema soka ni mali ya wachezaji, mashabiki, vilabu, vyama wanachama na taasisi zote zilizopewa jukumu la kulinda mustakabali wa mchezo huo, na si mali ya mtu mmoja au taasisi moja.

Yamesema ukuaji wa soka katika muongo uliopita haukuwa mafanikio ya mtu mmoja, bali ulitokana na ushirikiano wa FIFA, mashirikisho ya mabara na vyama wanachama.

AFC, Concacaf na UEFA pia zimekanusha kuwa upinzani wao unahusu fedha au kwamba wanataka kubadilisha maamuzi yaliyofikiwa kwa pamoja kuhusu upanuzi wa mashindano, mgao wa nafasi za Kombe la Dunia au misaada kwa vyama wanachama.

Badala yake, zimesema kinachopaswa kujadiliwa ni namna FIFA inavyoendeshwa na uwajibikaji wa viongozi wake.

Mashirikisho hayo yamesema uongozi wa soka si kitu cha kumilikiwa wala mamlaka ya kushikiliwa kwa ajili ya mtu binafsi, bali ni wajibu wa kuitumikia familia nzima ya soka.

Moja ya hoja kali katika barua hiyo ni kuhusu namna FIFA ilivyoeleza kilichotokea katika mpango wa kutafuta uwekezaji binafsi.

Kwa mujibu wa mashirikisho hayo, FIFA imejaribu kuonyesha kwamba tatizo lilikuwa ni mawasiliano yasiyotosheleza.

Hata hivyo, AFC, Concacaf na UEFA zimesema tatizo lilikuwa kubwa zaidi ya mawasiliano.

Yamesema pendekezo hilo liliwasilishwa kwa muda mfupi, bila mashauriano ya kutosha na kwa kuwekwa kwa muda wa mwisho ambao haukuwapa vyama wanachama nafasi ya kutosha kupitia masharti yake.

Kwa mtazamo wao, huo haukuwa uzembe wa kawaida bali mchakato uliowekwa kwa namna iliyopunguza nafasi ya uchunguzi na mjadala.

Mashirikisho hayo pia yamesema FIFA bado haijatambua kwamba wazo la kuuza sehemu ya maslahi katika Kombe la Dunia lenyewe lilikuwa kosa kubwa la uamuzi na lilivunja imani kati ya FIFA na taasisi inazopaswa kuzihudumia.

AFC, Concacaf na UEFA pia zimepinga mpango wa FIFA wa kuwasilisha ripoti kuhusu tukio hilo katika Baraza la FIFA.

Badala yake, zimetaka uchunguzi ufanywe na chombo huru kabisa kisichohusishwa na FIFA, wafanyakazi wake au wadau wowote wa ndani ya mfumo wa soka.

Zimesema FIFA yenyewe haipaswi kupewa jukumu la kujichunguza katika suala ambalo linahusu uongozi wake.

Mashirikisho hayo pia yamerudia wito wa kuhifadhi nyaraka na kumbukumbu zote zinazohusiana na suala hilo, kufuatia mawasiliano ya awali ya UEFA kuhusu uhifadhi wa taarifa hizo.

Barua hiyo imeeleza pia wasiwasi kuhusu mkutano wa hivi karibuni wa uongozi wa FIFA uliofanyika Morocco.

Kwa mujibu wa mashirikisho hayo, barua ya FIFA yenyewe ilithibitisha kuwa ni kiongozi mmoja tu aliyechaguliwa aliyeshiriki katika mkutano huo, huku wajumbe wa Baraza la FIFA na vyama wanachama wakiwa hawakualikwa.

Badala yake, mkutano huo ulihusisha baadhi ya viongozi wakuu wa utendaji ambao ni wafanyakazi wa FIFA.

AFC, Concacaf na UEFA zimesema kitendo cha baadhi ya viongozi wa menejimenti ya FIFA kuitwa nje ya makao makuu ya taasisi hiyo badala ya viongozi kwenda Zurich kujadili suala hilo kinaendelea kuongeza wasiwasi kuhusu namna taasisi hiyo inavyoendeshwa.

“Ukimya pale ambapo uwajibikaji unapaswa kuwepo, na umbali pale ambapo uwazi unapaswa kuwepo,” mashirikisho hayo yamesema.